ԵՄ-ն մեկնարկում է վիզաների ազատականացման երկխոսությունը խթանող 2.2 մլն եվրոյի ծրագիրը
Եվրոպական միությունը հունիսի 1-ին պաշտոնապես մեկնարկեց նոր երկամյա ծրագիր՝ «Աջակցություն Հայաստանում վիզաների ազատականացման երկխոսությանը՝ սահմանների կառավարման, փաստաթղթերի անվտանգության և իրավապահ մարմինների բարեփոխումների ոլորտներում» վերնագրով` ԵՄ-Հայաստան հարաբերությունների խորացմանն ուղղված զգալի քայլով:
Եվրոպական միության կողմից հատկացված 2.2 միլիոն եվրո ֆինանսավորմամբ այս ծրագիրն իրականացվում է Լիտվայի Ծրագրերի կառավարման կենտրոնական գործակալության կողմից՝ հիմնվելով ԵՄ անդամ այս պետության՝ եվրոպական ինտեգրման սեփական հաջողված փորձի վրա։
Ծրագրի մեկնարկը հաջորդում է կարևորագույն մի իրադարձության. վերջերս կայացած ԵՄ-Հայաստան գագաթնաժողովի ժամանակ Հայաստանի կառավարությանը հանձնվեց վիզաների ազատականացման գործողությունների առաջին զեկույցը: Այս զեկույցը ծառայում է որպես եվրոպական հստակ ուղեցույց՝ ներկայացնելով ռազմավարական առաջարկություններ կառավարման չորս հիմնական ուղղություններով․
- Ճամփորդական փաստաթղթերի անվտանգություն. տեխնոլոգիաների արդիականացում՝ միջազգային և ԵՄ անվտանգության խիստ չափանիշներին համապատասխանեցնելու նպատակով։
- Սահմանների, միգրացիայի և ապաստանի կառավարում. մարդասիրական, կազմակերպված և բարձր արդյունավետությամբ օժտված սահմանային ենթակառուցվածքների ստեղծում։
- Հասարակական կարգ և անվտանգություն. իրավապահ մարմինների միջև համագործակցության և ինստիտուցիոնալ բարեվարքության ամրապնդում։
- Հիմնարար իրավունքներ. տեղաշարժի ազատության ապահովում՝ մարդու իրավունքների և քաղաքացիական ազատությունների պաշտպանությանը զուգահեռ։
Միջոցառմանը ներկա էին բարձրաստիճան եվրոպացի պաշտոնյաներ և դիվանագետներ, այդ թվում՝ Հայաստանում ԵՄ պատվիրակության ղեկավար, դեսպան Վասիլիս Մարագոսը, Լիտվայի ներքին գործերի փոխնախարար Գինտարաս Ալիքսանդրավիչիուսը և Հայաստանում Լիտվայի արտակարգ և լիազոր դեսպան Անդրիուս Պուլոկասը։
Իմանալ ավելին
