Երևանում կայացել է ԵՄ-ի աջակցությամբ իրականացվող «Armenia BRIDGE» ծրագրի պաշտոնական մեկնարկը
2026 թ-ի նոյեմբերի 4-ին Երևանում կայացած « Armenia BRIDGE » (Հայաստանում ներդրումների, թվայնացման, աճի և ձեռնարկատիրության համար բիզնես կարգավորումների բարելավում) ծրագրի միջոցառումը համախմբեց պետական և մասնավոր հատվածների առանցքային շահագրգիռ կողմերին՝ ազդարարելով նախաձեռնության պաշտոնական մեկնարկը։ Անդրադառնալով այս կարևոր հանգրվանին՝ ԵՄ դեսպանն ընդգծեց հավաքի համագործակցային ոգին՝ շեշտելով, թե ինչպես է ծրագիրը կամրջում պետական պաշտոնյաներին և գործարար համայնքին՝ խթանելու կարևորագույն կարգավորող բարեփոխումներն ու ներդրումները։ Ծրագրի պաշտոնական մեկնարկն ընդգծեց Հայաստանում առավել թափանցիկ, մրցունակ և թվայնորեն զարգացած գործարար միջավայր ձևավորելու համատեղ հանձնառությունը։ Բարձրաստիճան պաշտոնյաների, մասնավորապես՝ ՀՀ ֆինանսների նախարար Վահե Հովհաննիսյանի ներկայությունը ևս մեկ անգամ փաստեց նախաձեռնության կառուցվածքային նպատակների նկատմամբ ներպետական ամուր պատասխանատվությունն ու աջակցությունը։ Ի վերջո, մեկնարկի միջոցառումը ծառայեց որպես համագործակցային մեկնակետ՝ փոխադարձ գործընկերության և տնտեսական դիմակայունության ներքո պետություն-մասնավոր երկխոսությունն ամրապնդելու համար։
«Armenia BRIDGE» ծրագիրը ԵՄ-ի ֆինանսավորմամբ առանցքային նախաձեռնություն է, որը համատեղ իրականացվում է Համաշխարհային բանկի խմբի և Միջազգային ֆինանսական կորպորացիայի կողմից, և միտված է Հայաստանի գործարար միջավայրի ամրապնդմանը՝ շուկա մուտք գործելու, գործունեություն ծավալելու և շուկայից դուրս գալու ընդհանուր իրավական դաշտի ու կարգավորող մեխանիզմների բարելավման միջոցով։2025 թ-ի նոյեմբերից մինչև 2029-ի մայիսն իրականացվող և 2,9 միլիոն եվրո ընդհանուր բյուջե ունեցող ծրագիրը մեծապես կենտրոնանում է ինստիտուցիոնալ կարողությունների և թվային հանրային ծառայությունների զարգացման վրա։
Ծրագիրն ուղղված է նաև Մրցակցության ազգային նոր քաղաքականության միջոցով դինամիկ, արդար և մրցակցային շուկայի ձևավորմանը։ Վերջնարդյունքում այս համատեղ ջանքերը կոչված են բարձրացնելու ներդրողների վստահությունը և խթանելու երկարաժամկետ աշխատատեղերի ստեղծումն ու տնտեսական աճը ողջ Հայաստանում։
Իմացիր ավելին
