Դեկտեմբերի 4, 2023թ․

ԵՄ դեսպան Վասիլիս Մարագոսը մասնակցել է Եվրոպական երիտասարդական պառլամենտի կողմից կազմակերպված «Կառուցելով դիմակայուն ապագա․ երիտասարդության դերը Հայաստանի և Եվրոպայի ժամանակակից մարտահրավերներին դիմակայելու գործում» թեմայով պանելային քննարկմանը: Միանալով ՀՀ կրթության, գիտության, մշակույթի և սպորտի փոխնախարար Արթուր Մարտիրոսյանին, Freedom House-ի ներկայացուցիչ Անդրանիկ Շիրինյանին և ՄԱԿ-ի Զարգացման ծրագրի փորձագետ Հովհաննես Երիցյանին՝ դեսպանը հայ և ԵՄ անդամ պետությունների երիտասարդների հետ հետաքրքիր և ակտիվ քննարկում է ծավալել երիտասարդությանը վերաբերող խնդիրների վերաբերյալ` օգնելով ավելի լավ հասկանալ ներկայիս Եվրոպան ։ Դեսպանը ներկայացրել է երիտասարդական գործողությանն աջակցելու և ներգրավվելու ԵՄ հանձնառությունը և խրախուսել երիտասարդների ներգրավվածությունը քաղաքական, քաղաքացիական և տնտեսական կյանքում՝ խթանելով ժողովրդավարությունը, ներառականությունը և կանաչ ու թվային անցումը։

Դեկտեմբերի 4, 2023թ․

Դեկտեմբերի 4-ին Հայկական բարեգործական ընդհանուր միության (ՀԲԸՄ) և Creative Armenia-ի (CA) կողմից համատեղ իրականացվող «KATAPULT» ստեղծագործական ծրագրի շրջանակներում Artbox-ը կազմակերպել էր «Mid-Journey» խորագիրը կրող  միջոցառում, որի ընթացքում Artbox նախաձեռնության բոլոր չորս ծրագրերի, մասնավորապես՝ ինկուբատոր, աքսելերատոր, նախաձեռնությունից մինչև մշակութային հաստատություն և արվեստագետից մինչև ձեռներեց ծրագրերին մասնակցող արվեստագետներն ու ստեգծագործողները, ներկայացրեցին իրենց կողմից իրականացվող նախագծերը։

Artbox-ը ստեղծվել է Creative Armenia-ի կողմից և իրականացվում է Հայաստանում Եվրոպական միության ֆինանսավորմամբ և ՀԲԸՄ հայաստանյան գրասենյակի հետ համագործակցությամբ՝ Katapult ստեղծարար ակսելերացիոն ծրագրի շրջանակներում։
Artbox-ը ստեղծագործական ինկուբատոր և աքսելերատոր ծրագիր է, որն ընդլայնում է Հայաստանի ստեղծարար տնտեսության սահմանները՝ տրամադրելով գործնական, ռազմավարական և երկարաժամկետ աջակցություն արվեստի տարբեր ճյուղերի արվեստագետներին և ստեղծագործողներին։ Այն հատկապես ուղղված է ստեղծագործողների շրջանում բիզնես մտածելակերպի և հմտությունների զարգացմանը և կայուն նախագծեր ու ապրանքներ ստեղծելուն:

Դեկտեմբերի 7, 2023թ․

Դեկտեմբերի 7-ին տեղի ունեցավ ԵՄ-Հայաստան Արդարադատության երկխոսության երրորդ հանդիպումը՝ Արդարադատության նախարարության, դատական համակարգի, այդ թվում՝ Բարձրագույն դատական խորհրդի, ԵՄ-ի, այդ թվում՝ ԵՄ անդամ երկրների, քաղաքացիական հասարակության և բիզնեսի ներկայացուցիչների մասնակցությամբ։ Այն կարևոր հանգրվան էր Հայաստանում դատական բարեփոխումների խթանման գործում՝ համապատասխան ՀԸԳՀ-ի առաջնահերթությունների։

Ոլորտային ռազմավարությունների իրականացման առաջընթացը քննարկելուց հետո միջոցառման ընթացքում հայտարարվեց ԵՄ Արդարադատության ոլորտի բյուջետային աջակցության ծրագրի շրջանակներում 3,6 մլն եվրո հատկացնելու մասին։

Դեկտեմբերի 11, 2023թ․

Դեկտեմբերի 11-ին ԵՄ դեսպան Վասիլիս Մարագոսը ներկա է գտնվել ԵՄ ֆինանսավորմամբ իրականացվող «ՀԸԳՀ իրականացման Քաղաքացիական հասարակության մշտադիտարկում Հայաստանում» ծրագրի շրջանակներում ԵՄ-Հայաստան Քաղաքացիական հասարակության պլատֆորմի կողմից հաստատված 10 խորհրդատվական կարծիքների ներկայացմանը և քննարկմանը։

«Եվրոպական միությունն ակնկալում է էլ ավելի սերտացնել աշխատանքը քաղաքացիական հասարակության հետ՝ ՀԸԳՀ, որպես «փոփոխության հասնելու ճանապարհային քարտեզ»-ի լիարժեք և արդյունավետ կիրարկման ուղղությամբ․ դա բխում է մեր փոխադարձ շահերից և օգուտ կբերի մեր հասարակություններին և քաղաքացիներին», – նշել է ԵՄ դեսպան Վասիլիս Մարագոսը։

Դեկտեմբերի 14, 2023թ

Եվրոպական հանձնաժողովն ամփոփել է Լեռնային Ղարաբաղի փախստականներին և ընդունող համայնքներին աջակցելու նպատակով 11,45 մլն եվրո մարդասիրական օգնության հատկացման գործընթացը։ Ստորագրվել են դրամաշնորհի տրամադրման համաձայնագրեր, մասնավորապես՝ ՄԱԿ ՓԳՀ, Պարենի համաշխարհային ծրագիր, «Մարդը կարիքի մեջ», «Գործողություն ընդդեմ սովի», ԿԽՄԿ և Ավստրիական Կարմիր խաչ կազմակերպությունների հետ՝ նպատակ ունենալով աջակցել ձմռանը դիմակայելու նախապատրաստմանը, օգնել սննդի և ապրուստի միջոցներով, ինչպես նաև աջակցել առողջապահական ծառայությունների, այդ թվում՝ հոգեկան առողջության և հոգեսոցիալական աջակցության հասանելիության ապահովմանը, բնակարանային և սոցիալական պաշտպանության հարցերով աջակցությանը:

Դեկտեմբերի 15, 2023թ

Մեկնարկեց Եվրոպական միության և Գերմանիայի տնտեսական համագործակցության և զարգացման դաշնային նախարարության կողմից համաֆինանսավորվող և 2,8 մլն եվրո բյուջեով «ԵՄ-ն Հայաստանի համայնքներում էներգաարդյունավետության և վերականգնվող էներգիայի համար» ծրագիրը։ Այն կնպաստի էներգաարդյունավետության և վերականգնվող էներգիայի փոքրամասշտաբ լուծումներին՝ ցածր եկամուտ ունեցող գյուղական կամ քաղաքային տնային տնտեսությունների և բնակավայրերի համար: Ծրագիրը փորձարկելու է էներգաարդյունավետության նորարարական մասշտաբային լուծումները։

Դեկտեմբերի 15, 2023թ․ 

Դեկտեմբերի 15-ին ՀՀ կրթության, գիտության, մշակույթի և սպորտի նախարար Ժաննա Անդրեասյանի և ՀՀ ֆինանսների նախարար Վահե Հովհաննիսյանի հետ հանդիպման ընթացքում ԵՄ դեսպան Վասիլիս Մարագոսը հայտարարել է 5 մլն եվրո հատկացման մասին՝ ԵՄ կողմից Հայաստանում կրթության ոլորտին ցուցաբերվող 30 մլն եվրո բյուջետային աջակցության շրջանակում։ ԵՄ-ն և ՀՀ-ն ռազմավարական գործընկերներ են կրթական բարեփոխումների ոլորտում։ Բյուջետային աջակցության ծրագիրն ողղված է գյուղական բնակավայրերում հանրակրթության բարելավմանը՝ Սյունիքում պիլոտային ծրագրերի իրականացման միջոցով։ 

Դեկտեմբերի 19, 2023թ․

Դեկտեմբերի 19-ին Հայաստանում ԵՄ պատվիրակության գործերի ժամանակավոր հավատարմատար Ֆրանկ Հեսսն Օշականում մասնակցել է «ՔԵԶ ՀԵՏ ՄԵԿ ՏԱՐԻ» խորագիրը կրող միջոցառմանը, որը երիտասարդության ոլորտում ԵՄ-Հայաստան համագործակցության ևս մեկ կարևոր իրադարձություն էր: Հայաստանում առաջին EuroClub-ը, որը ղեկավարվում է Երիտասարդ եվրոպական դեսպանների կողմից, նշեց ԵՄ աջակցությամբ Արագածոտնի մարզի երիտասարդների համար փոփոխություններ և հնարավորություններ ստեղծելու իր 1-ամյակը: 2022 թվականին տեղի ունեցած պաշտոնական մեկնարկից ի վեր՝ Օշականի EuroClub-ն իրականացրել է շուրջ 100 նախաձեռնություն՝ Օշականից և հարակից համայնքներից ներգրավելով ավելի քան 1200 երիտասարդի և Երիտասարդ եվրոպական դեսպանների հետ կազմակերպելով իրազեկման միջոցառումներ: 2023 թվականի Եվրոպական հմտությունների տարվա շրջանակներում և ցկյանս ուսումնառությանը նոր խթան հաղորդելու նպատակով Օշականի EuroClub-ի շահառուները հիմնել են տարբեր ակումբներ, մասնավորապես՝ BEE ACTive (Ակտիվ քաղաքացիության ակումբ), AngloBridge լեզվի ակումբ, լուսանկարչության և բնապահպանական ակումբներ և այլն: Դեսպանությունների ներկայացուցիչները, ՀՀ ԿԳՄՍՆ ներկայացուցիչները, տեղական իշխանությունները, երիտասարդները, ՀԿ-ները և Երիտասարդ եվրոպական դեսպանները նույնպես ներկա էին միջոցառմանը։

Հունվարի 16, 2024թ․

Եվրոպական միության (ԵՄ) պատվիրակության, ԵՄ գլխամասի և Հայաստանի Հանրապետության կառավարության ներկայացուցիչների մասնակցությամբ հրավիրվել էր նիստ՝ նվիրված 2017 թվականին ստորագրված Համապարփակ և ընդլայնված գործընկերության համաձայնագրի (ՀԸԳՀ) վեցամյակին։ Հանդիպման նպատակն էր նաև ընդգծել ԵՄ-ՀՀ հարաբերությունների շրջանակում ՀԸԳՀ-ի կարևոր նշանակությունը, ինչպես նաև գնահատել կիրարկման ներկա փուլը և բարձրացնել արդյունավետությունը: Համաձայնագրի նպատակն է ապահովել Հայաստանի և Եվրոպական միության համագործակցությունն՝ ի շահ Հայաստանի քաղաքացիների:

Հունվարի 18, 2024թ․

Հունվարի 18-ին Եվրոպական միությունը և ՀՀ անցկացրեցին Մարդու իրավունքների շուրջ երկխոսության 13-րդ նիստը։
Հայաստանի Հանրապետությունն ու Եվրոպական միությունը հանձնառու են իրենց գործընկերության ամրապնդմանը՝ առաջ մղելով մարդու իրավունքների շուրջ ձևավորված օրակարգը, ապահովելով տեսանելի օգուտներ իրենց քաղաքացիների համար, ինչպես նաև կառուցելով ավելի ներառական հասարակություններ: Այս տարվա երկխոսությունն ընդգրկում էր թեմաների լայն շրջանակ, ներառյալ՝ գենդերային  հավասարության, խտրականության բացառման, հավաքների ազատության, արտահայտման և տեղեկատվության ազատության, ընտրական և սահմանադրական բարեփոխումների, փախստականների իրավունքների, ինչպես նաև աշխատանքային իրավունքների ամրապնդմանը վերաբերող հարցեր:

ԵՄ պատվիրակությունը գլխավորում էր ԵՄ արտաքին գործողությունների եվրոպական ծառայության բաժնի ղեկավար տիկին Դորոտա Դլուչի-Սուլիգան: ՀՀ պատվիրակությունը գլխավորում էր Հայաստանի Հանրապետության ԱԳ նախարարի տեղակալ Պարույր Հովհաննիսյանը։

Հունվարի 30, 2024թ․

Հունվարի 30-ին մեկնարկեց KPI4HE նախագիծը՝ նպատակ ունենալով բարելավել բարձրագույն կրթության համակարգի կառավարումը, համալսարանի ռազմավարական պլանավորումն ու կառավարումը և նպաստել Հայաստանում որակյալ և ներառական, թվային և կանաչ ուղղվածություն ունեցող բարձրագույն կրթությանը: ԵՄ-ն մեծ նշանակություն է տալիս Հայաստանի կրթության ոլորտին և հատկացնում բյուջետային զգալի աջակցություն՝ կենտրոնանալով միջնակարգ կրթության վրա՝ Սյունիքի մարզում նախաձեռնված պիլոտային ծրագրով: Բարձրագույն կրթության հիմնական արդյունավետության ցուցանիշների (KPIs) ազգային շրջանակի մշակումն ու ներդրումը և Ինստիտուցիոնալ հետազոտությունների և պլանավորման ծառայությունների (IRPS) գործարկումը, ինչպես նաև պետական ինստիտուցիոնալ հավատարմագրման ստանդարտների վերանայումը, ճանապարհ կհարթեն Հայաստանում բարձրագույն կրթության հետագա բարելավման համար:

Փետրվարի 1, 2024թ․

Փետրվարի 1-ին տեղի ունեցավ ԵՄ կողմից ֆինանսավորվող «Միասին հանուն սոցիալական համայնքների» ծրագրի փակման աշխատաժողովը: Այն համախմբել էր Աշխատանքի և սոցիալական հարցերի, ինչպես նաև Տարածքային կառավարման և ենթակառուցվածքների նախարարությունների, տեղական ինքնակառավարման մարմինների, Սյունիքի, Արմավիրի, Շիրակի և Տավուշի 9 համայնքների տեղական միջոլորտային ցանցերի անդամներին, ծրագրի շահառուներին և իրականացնող գործընկերներին՝ ամփոփելու տեղական սոցիալական պլանների հիման վրա սոցիալական ծառայությունների փորձարկման արդյունքները և քննարկելու սոցիալական ծառայությունների մատուցման և ապակենտրոնացման ոլորտներում իրականացվող բարեփոխումները:

Ծրագիրը համաֆինանսավորվել է Եվրոպական միության և Ավստրիական զարգացման համագործակցության կողմից և 2021 թվականի փետրվարից իրականացվել «Հիլֆվերկ ինտերնեյշնլ» ավստրիական կազմակերպության կողմից՝ Հայաստանի սոցիալական աշխատողների ասոցիացիայի, «Գործընկերություն և ուսուցում» և «Ընտանիք և համայնք» ՀԿ-ների հետ գործընկերությամբ:

Փետրվարի 2, 2024թ․ 

«ԵՄ ֆինանսավորմամբ իրականացվող «Երևան, Վարշավա, Տիրանա մայրաքաղաքների համագործակցությունը վտանգավոր թափոնների կառավարման ընդհանուր մարտահրավերների շուրջ» ծրագրի շնորհիվ Երևանի քաղաքապետարանն առաջընթաց է գրանցել իր բնապահպանական նախաձեռնություններն իրականացնելու ուղղությամբ՝ իր քաղաքացիների համար Երևանն ավելի մաքուր, կանաչ և առողջ դարձնելով :

Փետրվարի 2-ին Հայաստանում ԵՄ պատվիրակության համագործակցության բաժնի ղեկավար Ֆրանկ Հեսսը ներկա է գտնվել Երևանի քաղաքապետարանի թափոնների տեսակավորման և վերամշակման ծրագրի բացման արարողությանը, որը հանդիսանում է ԵՄ կողմից ֆինանսավորվող աղբատար մեքենաների և բեռնարկղերի ներդրման նախաձեռնության շարունակությունը:

Եվրոպական միությունը կարևորում է  «Կանաչ գործարքի» իրականացումը՝ համարելով այն ԵՄ-ի հանձնառությունն ապագա սերունդների հանդեպ: Այս համատեքստում ԵՄ-ն ակտիվորեն խրախուսում է շրջակա միջավայրի պաշտպանության և կայունության ոլորտում իր փորձից բխող գիտելիքների և օպտիմալ մոտեցումների տարածումը, ինչպես նախատեսված է այս ծրագրով:

Փետրվարի 13, 2024թ․

2024թ. փետրվարի 13-ին Բրյուսելում կայացել է Հայաստան-ԵՄ Գործընկերության խորհրդի 5-րդ նիստը: 
Այն նախագահում էր Արտաքին գործերի և անվտանգության քաղաքականության գերագույն ներկայացուցիչ Ժոզեպ Բորելը, իսկ հայկական պատվիրակությունը՝ Հայաստանի Հանրապետության արտաքին գործերի նախարար Արարատ Միրզոյանը։ Ներկա էր նաև Եվրոպական հանձնաժողովի Եվրոպական հարևանության և ընդլայնման հարցերով գլխավոր տնօրինության գլխավոր տնօրեն Գերտ Յան Քուփմանը:
Հանդիպմանը հաստատվել է ՀՀ և ԵՄ փոխադարձ հետաքրքրությունն ու հանձնառությունը՝ ամրապնդելու և խորացնելու հարաբերությունները՝ հիմնված ընդհանուր արժեքների վրա: Այդ նպատակով կողմերը պայմանավորվել են աշխատանքներ սկսել Հայաստան-ԵՄ Գործընկերության նոր օրակարգի ուղղությամբ՝ բոլոր հարթություններում համագործակցության համար սահմանելով ավելի հավակնոտ համատեղ առաջնահերթություններ:
ԵՄ-ն և Հայաստանը քննարկել են ԵՄ-Հայաստան Համապարփակ և ընդլայնված գործընկերության համաձայնագրի իրականացումը և ողջունել են ձեռք բերված առաջընթացը, ինչպես նշված է վերջերս հրապարակված Գործընկերության իրականացման զեկույցում: Այնուհետև Գործընկերության խորհուրդը քննարկել է քաղաքական երկխոսությանը և բարեփոխումներին, ժողովրդավարությանը, օրենքի գերակայությանը և մարդու իրավունքներին, տնտեսական, առևտրային և ոլորտային համագործակցությանը, ինչպես նաև միգրացիային, շարժունակությանը և վիզայի ազատականացմանը վերաբերող հարցեր:

Վերջում մասնակիցները մտքեր են փոխանակել տարածաշրջանային խնդիրների և արտաքին ու անվտանգության քաղաքականության վերաբերյալ։ Այս առիթով ԵՄ-ն նաև հայտարարել է 5,5 միլիոն եվրո հավելյալ մարդասիրական օգնության մասին՝ Լեռնային Ղարաբաղից տեղահանված հայերին աջակցելու համար։ Կողմերն ընդգծել են Հարավային Կովկասում կայուն խաղաղության և կայունության հաստատման բացարձակ անհրաժեշտությունը։

Փետրվարի 16, 2024թ․

ԵՄ ֆինանսավորմամբ գործող Արևելյան գործընկերության Քաղաքացիական հասարակության հիմնադրամը նշեց իր «Communication Labs» ծրագրի հաջող ավարտը: Ծրագրի շրջանակում հայկական ՔՀԿ-ները մշակել էին տասն ազդեցիկ արշավ՝ անդրադառնալով այնպիսի կարևոր խնդիրների, ինչպիսիք են՝ ապատեղեկատվության դեմ պայքարը, ներառականության խթանումը և մարգինալացված համայնքների հզորացումը: Երեք ՔՀԿ-ներ պարգևատրվել են՝ յուրաքանչյուրը ստանալով սեփական արշավը սկսելու համար նախատեսված ԵՄ ֆինանսավորում։ 

Փետրվարի 22, 2024թ․

ԵՄ դեսպան Վասիլիս Մարագոսը հանդիպել է EU NEIGHBOURS east ծրագրի «Երիտասարդ եվրոպական դեսպաններ» նախաձեռնության նոր անդամներին։

Քննարկման ընթացքում դեսպան Մարագոսը և Երիտասարդ եվրոպական դեսպանները մտքեր են փոխանակել ԵՄ-Հայաստան հարաբերություններում երիտասարդության դերի վերաբերյալ։ ԵՄ դեսպանն ընդգծել է երիտասարդների նվիրվածության և ներգրավվածության կարևորությունը երկրի համար ավելի լավ ապագայի կերտման գործում:

«Երիտասարդ եվրոպական դեսպաններ» նախաձեռնությունը, հանդիսանալով ոչ քաղաքական և կամավոր հաղորդակցման ցանց, ներկայում ներառում է 144 անդամ Հայաստանում՝ նպաստելով երկրի հետ ԵՄ համագործակցության մասին իրազեկության բարձրացմանը և դրական արդյունքների տարածմանը։

Նոյեմբերի 29, 2023թ․

Եվրոպական արտաքին գործողությունների ծառայության և Եվրոպական հանձնաժողովի պատվիրակությունն այցելեց Հայաստան՝ Համապարփակ և ընդլայնված գործընկերության համաձայնագրի շրջանակում ԵՄ-Հայաստան հարաբերություններն ընդլայնելու նպատակով: Մասնակիցները քննարկել են համագործակցության հետագա ամրապնդման և բարեփոխումների իրականացման ուղիները, այդ թվում՝ ներդրումների միջոցով inter alia, էներգետիկայի, տրանսպորտի, թվային, հետազոտությունների և նորարարության ոլորտներում: Մտքեր են փոխանակվել, առ այն թե ինչպես լավագույնս օգտագործել ներդրումները՝ տեղահանված Ղարաբաղի հայերի հրատապ կարիքները հասցեագրելու և նրանց ինտեգրումը հնարավոր դարձնելու համար, ինչպես նաև երկարաժամկետ հեռանկարում Հայաստանի սոցիալական և տնտեսական դիմակայունությունը բարձրացնելու ուղղությամբ:

ԵՄ-ն նաև խոստացել է աջակցել Հայաստանի և Ադրբեջանի միջև հարաբերությունների կարգավորմանը։ Այցի ընթացքում ազդարարվել է Եվրոպական միության և Հայաստանի Հանրապետության միջև ներդրումների համակարգման հարթակի մեկնարկը: Ստորագրվել է երկու ծրագիր՝ մանկապարտեզներում էներգաարդյունավետության բարձրացման և հայաստանյան ՓՄՁ-ներին աջակցելու նպատակով։
ԵՄ-ն վերահաստատել է իր հանձնառությունը Հայաստանում ԵՄ առաքելության ամրապնդման հարցում և այցի ընթացքում հանդիպումներ ունեցել պետական պաշտոնյաների, քաղաքացիական հասարակության և ՄԱԿ-ի գործակալությունների ներկայացուցիչների հետ:

Նոյեմբերի 30, 2023թ․

ԵՄ աջակցության շնորհիվ արդեն հիմնանորոգվել է 6 մանկապարտեզ, 9 մանկապարտեզում կիրականացվի կապիտալ վերանորոգում, 35 մանկապարտեզ կօգտվի էներգախնայողությունը և վերականգնվող էներգետիկայի զարգացումը խթանող միջոցառումներից։
Որպես Արևելյան Եվրոպայի էներգաարդյունավետության և շրջակա միջավայրի գործընկերության (E5P) հիմնադրամի ամենամեծ ներդրող՝ Եվրոպական միությունն ուրախ է նպաստել երեխաների համար ավելի անվտանգ, ներառական և առողջ միջավայրի ստեղծմանը` միաժամանակ օգնելով Հայաստանին օգտագործել ավելի քիչ էներգիա և ֆինանսական ռեսուրսներ:
Երևանում գործարկվեց ԵՄ կողմից վերանորոգված ևս մեկ՝ թիվ 109 մանկապարտեզը։ Շուրջ 170 փոքրիկների համար ապահովվել են բարեկարգ, անվտանգ ու էներգաարդյունավետ պայմաններ։
E5P հիմնադրամն իր ներդրումների միջոցով ձգտում է հասնել Կայուն զարգացման բազմաթիվ նպատակների․ կայուն քաղաքներ, մաքուր ջուր, սանիտարական լավ վիճակ, կլիմայի փոփոխության պատասխան գործողություններ և այլն: Ենթադրվում է, որ E5P ծրագրերի շրջանակում խնայված էներգիայի արդյունքում CO2 գազի արտանետումների կրճատումը համարժեք կլինի մոտ 1 միլիոն տոննային, կլինեն նաև բազմաթիվ այլ օգուտներ՝ քաղաքներում օդի աղտոտվածության, թափոնների և կեղտաջրերի նվազեցման առումով: