Նոր Եվրոպական գերազանցության նախաձեռնությունն ընտրում է բարձրագույն ուսումնական հաստատություններին հզորացնելու եւ համագործակցությունն ընդլայնելու նախագծեր

Եվրոպական հանձնաժողովը 80 միլիոն եվրո է ներդնում Եվրոպական գերազանցության նախաձեռնության կողմից ֆինանսավորվող 16 նոր նախագծերում՝ խթանելով հետազոտությունների եւ նորարարությունների (R&I) ոլորտում համագործակցությունը եւ գերազանցությունը Եվրոպայի տարբեր համալսարաններում: Հաղթող նախագծերից երկուսը օգուտ կբերեն Հայաստանին, Վրաստանին, Մոլդովային եւ Ուկրաինային:

Նախաձեռնությունը համալսարաններին աջակցում է գիտական ​​գերազանցության զարգացման, գիտելիքների արժեւորման բարելավման եւ Եվրոպայի գործընկերների հետ ավելի ամուր կապերի կառուցման գործում: Ռազմավարական համագործակցության, տաղանդների զարգացման եւ ինստիտուցիոնալ բարեփոխումների միջոցով այն նպատակ ունի ստեղծել ավելի մրցունակ, դիմակայուն եւ միջազգային կապեր ունեցող բարձրագույն կրթության համակարգ:

284 հայտադիմումներից ընտրված այս 16 նախագծերը կիրականացվեն 2026 թվականի սեպտեմբերից մինչեւ 2027 թվականի հունվարն ընկած ժամանակահատվածում։

Նախագծերի հետազոտական ​​հետաքրքրությունները ընդգրկում են լայն շրջանակի ոլորտներ՝ շրջանաձեւ տնտեսությունից մինչեւ գյուղատնտեսություն, ուղեղի առողջություն, ռոբոտաշինություն եւ այլն։

Օրինակ՝ WARIE-ն համակարգվում է ՀՀ Գիտությունների ազգային ակադեմիայի Ինֆորմատիկայի եւ ավտոմատացման պրոբլեմների ինստիտուտի կողմից։ Այն կաջակցի Հայաստանի, Վրաստանի եւ Մոլդովայի համալսարաններին արհեստական ​​բանականության առաջադեմ տեխնոլոգիաների զարգացման գործում՝ հետազոտական ​​կենտրոնների ստեղծման, առաջադեմ վերապատրաստման, թվային ենթակառուցվածքների արդիականացման եւ Եվրոպական հետազոտական ​​տարածքին ավելի սերտ ինտեգրման միջոցով, այդպիսով խթանելով նորարարությունը եւ տարածաշրջանային մրցունակությունը:

HydraLink նախագիծը համակարգվում է Ուկրաինայի կենսաբանական եւ շրջակա միջավայրի գիտությունների ազգային համալսարանի կողմից: ԵՄ-ի մոտ 5 միլիոն եվրո ներդրմամբ նախագիծը նպատակ ունի արդիականացնել Ուկրաինայի, Լիտվայի, Լատվիայի եւ Հունաստանի բարձրագույն ուսումնական հաստատությունները՝ ամրապնդելով ինստիտուցիոնալ գերազանցությունը, հետազոտական ​​​​կարողությունները եւ նորարարությունը «Վերահսկվող միջավայրի գյուղատնտեսության» ոլորտում: Սա գյուղատնտեսության տեխնոլոգիական մոտեցում է, որը մշակաբույսեր է աճեցնում փակ կառույցների ներսում՝ ճշգրիտ կառավարելով շրջակա միջավայրի գործոնները, ինչպիսիք են ջերմաստիճանը, լույսը, խոնավությունը եւ սննդանյութերը:

Եվրոպական գերազանցության նախաձեռնությունը (EEI) «Հորիզոն Եվրոպա՝ մասնակցության ընդլայնում եւ գերազանցության տարածում» ծրագրի մի մասն է։ Դրա նպատակներն են հզորացնել ընդլայնվող երկրների բարձրագույն ուսումնական հաստատությունները եւ ամրապնդել նրանց հետազոտական ​​եւ նորարարական կարողությունները։

Իմացիր ավելին

Մամուլի հաղորդագրություն

Նոր Եվրոպական գերազանցության նախաձեռնությունն ընտրում է բարձրագույն ուսումնական հաստատություններին հզորացնելու եւ համագործակցությունն ընդլայնելու նախագծեր նյութն առաջինը հրապարակվել է  EU NEIGHBOURS east կայքում։