«-46°C» ձմեռային փառատոն Շիրակի մարզում

Փետրվարի 25, 2023

Եվրոպական միության և Ավստրիական զարգացման համագործակցության աջակցությամբ իրականացվող «Տեղական դերակատարների զորեղացում հանուն զարգացման Շիրակի մարզում» ծրագրի շրջանակներում Շիրակի մարզում փետրվարի 25-ին կայացավ «-46°C» ձմեռային փառատոնը: Ձմեռային արկածային տուրիզմի ավելի քան 500 մասնակից միացել էր «-46°C» փառատոնին։ Փառատոնը զարգացման բրենդն է, որը ստեղծվել է Շիրակի մարզում ԵՄ գյուղական զարգացման «Լիդեր» մեթոդաբանությամբ աշխատող «Հյուսիսային ուղի» տեղական ակտիվ խմբի կողմից՝ նպատակ ունենալով տեղացի դերակատարներին ձմեռային արկածային տուրզիմի զարգացման շուրջ միավորելով զարգացնելու Շիրակի հյուսիսը։

ԵՄ-ն շարունակում է աջակցել ստեղծարար ձեռներեցներին Artbox Entrepreneur ծրագրի միջոցով

Փետրվարի 20, 2023

Փետրվարի 20-ին, ԵՄ աջակցությամբ իրականացվող «Կատապուլտ» ստեղծարար ակսելերացիոն ծրագրի շրջանակներում, պաշտոնապես մեկնարկեց Artbox Entrepreneur ծրագիրը՝ նորընտիր 24 մասնակցով։ Միջոցառման ընթացքում ցուցադրվեց Artbox Incubator ծրագրին մասնակցած 23 ստեղծարար նախագծերը: Artbox Entrepreneur ծրագիրը հնարավորություն է ընտրված ստեղծարար ձեռներեցների նոր սերնդի համար գալիք 8 շաբաթների ընթացքում հանդիպել և աշխատել ակնառու մենթորների հետ՝ մշակելու իրենց ստեղծարար կարիերայի խթանման պլանը։ «Կատապուլտ» ստեղծարար ակսելերացիոն ծրագիրը իրականացնում են ՀԲԸՄ-ն և Creative Armenia-ն:

Կայացավ «Բաց և մասնակցային կառավարման օրակարգը Հայաստանում» միջոցառումը

Փետրվարի 8, 2023

Փետրվարի 8-ին, Եվրոպական միության ֆինանսական աջակցությամբ՝ ՄԱԿ-ի Զարգացման ծրագրի «Ապագան այսօր. կանանց, երիտասարդների և երեխաների հզորացում հանուն Հայաստանում ժողովրդավարության ամրապնդման» ծրագրի շրջանակներում կայացավ «Բաց և մասնակցային կառավարման օրակարգը Հայաստանում» միջոցառումը։ Միջոցառման նպատակն էր գնահատել «ԲԿԳ Հայաստան 2022-2024թթ գործողությունների ծրագրի» արդյունքները, մշակել ռազմավարական առաջարկներ և ներկայացնել գնահատման արդյունքների ու առաջարկությունների վերաբերյալ հաշվետվությունը։ ԲԿԳ-ի նպատակն է կառուցել ժողովրդավարության ավելի լավ մոդել՝ խարսխված բաց կառավարման արժեհամակարգի՝ թափանցիկության, հաշվետվողականության, հանրային մասնակցության և ընդգրկման հիմքի վրա: Եվ քաղաքացիական հասարակությունը վճռորոշ դերակատարում ունի՝ ապահովելու ԲԿԳ-ի որպես ներառական և մասնակցային ժողովրդավարության հարթակի շարունակականությունը:

Երիտասարդական բանավեճի մրցաշար Հայաստանի տարբեր մարզերից ներկայացուցիչների մասնակցությամբ

Փետրվարի 6, 2022

Եվրոպական միությունը մշտապես կարևորելով երիտասարդության դերը ժողովրդավարացման գործընթացներում՝ «ԵՄ-ն հանուն երիտասարդության․ բանիմաց և ակտիվ երիտասարդներ հանուն ժողովրդավար Հայաստանի` այսօր և վաղը» ծրագրի շրջանակներում, Վորլդ Վիժն Հայաստանի և Ջինիշյան հիշատակի հիմնադրամի կողմից փետրվարի 6-ին՝ կազմակերպվել էր Երիտասարական բանավեճի մրցաշար: Մի քանի փուլերից բաղկացած բանավեճի մրցաշարին մասնակցել են Արագածոտնը, Գեղարքունիքը, Լոռին, Շիրակը և Երևանը ներկայացնող 70 դպրոցների աշակերտներից կազմված տասնվեց թիմեր` գործնականում կիրառելով հանրային բանավեճի և հիմնավորված փաստարկման իրենց հմտությունները։

ԵՄ աջակցությամբ կայացավ Հայաստանում աշխատանքային իրավունքների պաշտպանության թեմայով քննարկում

Փետրվարի 1, 2023

Փետրվարի 1-ին, Հայաստանում աշխատանքային իրավունքների պաշտպանության թեմայով ԵՄ կողմից ֆինանսավորվող կոնսորցիումը, որի կազմում են երեք հասարակական կազմակերպություններ՝ Հելսինկյան Քաղաքացիական Ասամբլեա – Վանաձոր, Տեղեկատվական և հաղորդակցական տեխնոլոգիաների գործատուների միությունը (UEICT) և ՕքսԵՋեն հիմնադրամը, կազմակերպել էին քննարկում։ Քննարկման մասնակիցները անդրադարձան աշխատանքային իրավունքներին առնչվող ընթացիկ մարտահրավերներին, մասնավորապես՝ անվտանգության և առողջության ոլորտում և դրանց տնտեսական բարդությունների համատեքստում: Սոցիալական երկխոսությունը կենսական նշանակություն ունի ցանկացած կազմակերպության համար, և այդ երկխոսության խթանման մեխանիզմը աշխատանքային իրավունքներն են: Ուստի, աշխատանքային օրենսդրությունը չպետք է դիտվի որպես ձեռնարկատիրական ազատության խոչընդոտ, այլ ավելի շուտ որպես ընդհանուր նախագծի, ընկերության զարգացման և գործունեության շուրջ ավելի լավ միավորվելու գործիք:

Եվրոպական միությունն աջակցում է Հայաստանում կին իրավապաշտպաններին

Հունվարի 27, 2023

Հունվարի 27-ին ԵՄ ֆինանսավորմամբ «Ընդդեմ կանանց նկատմամբ բռնության» կոալիցիայի կողմից իրականացվող «Կին իրավապաշտպանները պայքարում են գենդերային բռնության դեմ Հայաստանում» ծրագրի շրջանակներում կազմակերպվել էր միջոցառում, որի նպատակն էր գնահատել վերջին երեք տարվա ընթացքում կատարված աշխատանքների ծավալը, առաջընթացն ու դինամիկան: Միջոցառմանը քննարկվեցին նաև վերաբերմունք և կարծրատիպեր փոփոխելու երկար ճանապարհին նախատեսվող անելիքները:

Մեկնարկեց «Դիմակայուն Սյունիք Թիմ Եվրոպա նախաձեռնությունը»

Հունվարի 18, 2023

Հունվարի 18-ին մեկնարկեց «Դիմակայուն Սյունիք Թիմ Եվրոպա նախաձեռնությունը»։ Սկզբնական շուրջ 51 մլն. եվրո բյուջե ունեցող «Դիմակայուն Սյունիք թիմ Եվրոպա նախաձեռնությունը» Եվրոպական միության, Եվրոպական ներդրումային բանկի, ԵՄ անդամ պետություններ՝ Ավստրիայի, Ֆրանսիայի, Գերմանիայի, Լեհաստանի, Շվեդիայի, ինչպես նաև գործընկեր հանդիսացող Շվեյցարիայի համատեղ նախաձեռնությունն է։ «Դիմակայուն Սյունիք Թիմ Եվրոպա նախաձեռնությունը» համահունչ է ՀՀ Կառավարության կողմից սահմանված՝ Սյունիքի մարզի զարգացման, ինչպես նաև՝ ԵՄ Տնտեսական և ներդրումային պլանի շրջանակում Հայաստանի հարավային մարզերի դիմակայունության վերաբերյալ ուղենշային ծրագրի առաջնահերթություններին։ Նախաձեռնության հիմնական նպատակն է նպաստել Սյունիքի մարզի կայուն սոցիալ-տնտեսական և ինստիտուցիոնալ զարգացմանը։

Հայաստանում ԵՄ դեսպան Անդրեա Վիկտորինն իր խոսքն ուղղեց Factor TV-ում փորձաշրջանն ավարտած ուսանողներին

Հունվարի 13, 2023

Հայաստանում ԵՄ դեսպան Անդրեա Վիկտորինը ԵՄ ֆինանսական աջակցությամբ և DW Deutsche Welle մեդիաընկերության կողմից՝ BBC Media Action նախաձեռնության, «Բաց հասարակության ինստիտուտի օժանդակության հիմնադրամ»-ի հայաստանյան մասնաճյուղի, Factor TV տեղեկատվական կենտրոնի և Hetq Հետաքննող լրագրողների հետ համագործակցությամբ իրականացվող «Կառուցենք կայուն և պրոֆեսիոնալ մեդիա» ծրագրի շրջանակում, մասնակցեց լրագրողական հմտությունների զարգացման փորձաշրջանի ավարտական միջոցառմանը, որն անցկացվեց Factor TV-ում։ Փորձաշրջանն ավարտող 12 ուսանողներին ուղղված խոսքում՝ դեսպանը նշեց. «Որպես ապագա լրագրողներ՝ դուք կարող եք լինել ամենաազդեցիկը, բայցև՝ ամենախոցելին, քանի որ կարող եք դառնալ պոտենցիալ թիրախ անհատների և լոբիստական խմբերի համար։ Դինամիկ, բազմակարծ հասարակության համար անհրաժեշտ է ազատ, անկախ, վստահելի և պատասխանատու լրատվամիջոցների ներկայություն: Շնորհակալություն բոլոր մեդիա գործընկերներին, ովքեր ձեզ հնարավորություն են տվել բացահայտելու խիստ պահանջված լրագրոության ոլորտը, որը մշտապես պայքարում է ապատեղեկատվության և կեղծ լուրերի դեմ»։

Երիտասարդ եվրոպական դեսպանների կողմից առաջին Եվրաակումբը ստեղծվեց Օշականում

Դեկտեմբերի 19, 2022

«Երիտասարդ եվրոպական դեսպաններ» ցանցի Հայաստանում գործող թիմի կողմից դեկտեմբերի 19-ին Օշականում ազդարարվեց Հայաստանում առաջին Եվրաակումբի՝ «EuroClub Oshakan»-ի պաշտոնական մեկնարկը։ ԵՄ դեսպան Անդրեա Վիկտորինը ողջունեց դեսպանների այս նախաձեռնությունը՝ ընդգծելով դրա կարևորությունը տեղական համատեքստում, հատկապես՝ գյուղական համայնքներում ապրող երիտասարդների համար: Եվրաակումբը ստեղծվել է նպատակ ունենալով ծառայեցնել այն ոչ միայն երիտասարդների հարթակ, որտեղ նրանք կարող են զարգացնել ներգրավմանը միտված և քաղաքացիական գործունեությամբ զբաղվելու համար անհրաժեշտ հմտություններ, այլև դարձնել այն հայկական մշակույթը եվրոպացի հասակակիցներին ներկայացնելու լավագույն վայր։

Հայաստանում ստեղծվել է սոցիալական ձեռներեցության առաջին «Via Fund» հիմնադրամը

Դեկտեմբերի 14, 2022

Հայաստանում իր տեսակի մեջ առաջին Ազդեցության ներդրումային հիմնադրամ հանուն սոցիալական ձեռներեցության՝ «Via Fund» հիմնադրամի մեկնարկը տրվեց դեկտեմբերի 14-ին։ «Via Fund» հիմնադրամը նախաձեռնվել և իրականացվում է «Համագործակցություն հանուն ազդեցության» ծրագրի շրջանակներում՝ Եվրոպական վենչուրային բարեգործական ասոցիացիայի կողմից՝ Իմփաքթ Հաբ Երևանի հետ համատեղ։ Via Fund-ի նպատակն է աջակցել սոցիալական ձեռնարկություններին՝ հասնելու իրենց առջև դրված նպատակներին և ընդարձակելու դրանց ազդեցությունը՝ ՀՀ տեղական էկոհամակարգ բերելով ազդեցության նոր մշակույթ և փորձ:

ԵՄ աջակցությամբ կայացավ «50 կանայք, որ փոխեցին աշխարհը» գրքի շնորհանդեսը

Դեկտեմբերի 5, 2022

Հաշմանդամություն ունեցող անձանց միջազգային օրը՝ դեկտեմբերի 5-ին Եվրոպական միության

ֆինանսական աջակցությամբ՝ ՄԱԿ-ի Բնակչության հիմնադրամի կողմից իրականացվող «Պտղի սեռով պայմանավորված խտրական ընտրության և հարակից վնասակար գործելակերպերի կանխարգելումը Հարավային Կովկասում. աջակցություն տարածաշրջանային, ազգային և հարավ-հարավ նախաձեռնություններին» ծրագրի շրջանակներում, կայացավ «50 կանայք, որ փոխեցին աշխարհը» գրքի շնորհանդեսը։ Եվրոպական միությունը բազմաթիվ մեխանիզմների ներդրման և այլ դերակատարների ներգրավման միջոցով աջակցում է հաշմանդամություն ունեցող անձանց իրավունքների պաշտպանությանը՝ օգնության ձեռք մեկնելով Կառավարությանը՝ իրագործելու բարեփոխումների ուղղությամբ ներդրվող ջանքերը, հատկապես՝ 2021 թվականի մայիսի 5-ից հետո, երբ Հայաստանի խորհրդարանի կողմից ընդունվեց Հայաստանի Հանրապետության օրենքը «Հաշմանդամություն ունեցող անձանց իրավունքների մասին»։ ԵՄ-ը աջակցությունն այս ուղղությամբ շարունակական է:

ԵՄ-ՀԱՅԱՍՏԱՆ ՀԱՄԱԳՈՐԾԱԿՑՈՒԹՅՈՒՆ