Հայաստան․ ԵՄ-ն պաշտոնապես մեկնարկել է ԵՄԳԱ-ն
Եվրոպական միության խորհուրդն այսօր մեկնարկել է Հայաստանում ԵՄ գործընկերության առաքելությունը (ԵՄԳԱ Հայաստան), որը իրականացվում է Ընդհանուր անվտանգության և պաշտպանության քաղաքականության (ԸԱՊՔ) ներքո։
Առաքելությունը պաշտոնապես հիմնվել է 2026 թ. ապրիլի 21-ին՝ աջակցելու Հայաստանի կարողություններին դիմագրավելու հիբրիդային մարտահրավերներին, այդ թվում՝ կիբերսպառնալիքներին, օտարերկրյա տեղեկատվական մանիպուլյացիաներին ու միջամտությանը (FIMI) և ապօրինի ֆինանսական հոսքերին։ Մասնավորապես, առաքելությունը ռազմավարական խորհրդատվություն, տեխնիկական փորձագիտական աջակցություն և ինստիտուցիոնալ կարողությունների զարգացմանն ուղղված օգնություն կտրամադրի Հայաստանի տարբեր պետական կառույցներին՝ նման սպառնալիքներին արձագանքելու համար, ինչպես նաև կաջակցի կառավարության բոլոր օղակների ներգրավմամբ իրականացվող համապարփակ մոտեցմանը։
Բացի այդ, առաքելությունը կտրամադրի գործառնական, ռազմավարական խորհրդատվություն և կստեղծի նպատակային նախագծերի իրականացման հատուկ խումբ՝ իր մանդատի շրջանակներում նախատեսված գործողություններն իրականացնելու համար՝ սերտ համագործակցելով միջազգային գործընկերների հետ։
ԵՄԳԱ Հայաստանն ոչ գործադիր (ոչ օպերատիվ) առաքելություն է և որևէ դերակատարում չի ունենա Հայաստանի իշխանությունների կողմից որոշումների կայացման գործընթացներում։ ԵՄԳԱ Հայաստանն ստեղծվել է Հայաստանի կառավարության խնդրանքով և հանդիսանում է ԵՄ ավելի լայն ու հետևողական մոտեցման մաս՝ համատեղելով կարճաժամկետ և երկարաժամկետ աջակցությունը՝ Հայաստանի ազգային անվտանգությունն ամրապնդելու նպատակով։
«Անցյալ շաբաթ ԵՄ-ն ներկայացրեց Հայաստանին ուղղված տնտեսական և քաղաքական աջակցության խոշոր փաթեթ՝ ռուսական ճնշմանը դիմակայելու հարցում օգնելու համար։ Այսօր մենք տեղակայում ենք ԵՄ նոր առաքելություն։ ԵՄ փորձագետները կաջակցեն Հայաստանի իշխանություններին կիբերսպառնալիքների և ապատեղեկատվության դեմ պայքարում, ինչպես նաև ապօրինի ֆինանսական հոսքերի կասեցման գործում», – նշել է ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասը։ «Եվրոպական միությունը դիմակայուն և անկախ Հայաստանի, ինչպես նաև հայ ժողովրդի՝ սեփական ճակատագիրն ինքնուրույն որոշելու իրավունքի ամենահաստատակամ պաշտպանն է։ Մենք կապահովենք, որ Հայաստանը չի բախվի արտաքին պարտադրանքին մեն-մենակ»։
Առաքելության ղեկավար է նշանակվել Կոսմին Ջորջ Դինեսկուն 2026 թ-ի հունիսի 11-ին: Նախկինում նա ծառայել է որպես Մոլդովայի Հանրապետությունում ԵՄ գործընկերության առաքելության առաջին ղեկավար։
Առաքելության նախնական մանդատը երկու տարի է։
Իմանալ ավելին
Armenia: EU launches partnership mission to support resilience against evolving hybrid threats նյութն առաջինը հրապարակվել է EU NEIGHBOURS east կայքում։
