2026 թ-ի ապրիլին ԵՄ-ն հայտարարեց Հայաստանում ԵՄ գործընկերության առաքելության (ԵՄԳԱ) ստեղծման մասին: Հայաստանի խնդրանքով ձևավորված այս նոր քաղաքացիական առաքելությունը կօգնի հակազդել արտաքին միջամտությանը և ապատեղեկատվությանը: Սա ԵՄ հանձնառության շոշափելի դրսևորում է Հայաստանի ժողովրդավարական ինստիտուտների, քաղաքացիական հասարակության և անկախ լրատվամիջոցների նկատմամբ, որպեսզի նրանք կարողանան ստեղծել պայմաններ, որ ՀՀ քաղաքացիները քվեարկեն հանուն իրենց ապագայի՝ առանց միջամտության կամ խափանումների։

ԵՄ-ն և Հայաստանը 2025 թ-ին կնքել են, այսպես կոչված, շրջանակային մասնակցության համաձայնագիր, որը թույլ է տալիս Հայաստանին մասնակցել ԵՄ-ի ընդհանուր անվտանգության և պաշտպանության քաղաքականության շրջանակներում քաղաքացիական ճգնաժամերի կառավարման առաքելություններին և գործողություններին։ ԵՄ առաքելություններին և գործողություններին Հայաստանի մասնակցությունն ամրապնդում է կողմերի միջև անվտանգության կապերը և փոխգործելիությունը՝ միաժամանակ նպաստելով միջազգային խաղաղությանը և անվտանգությանը։

ԵՄ-ն Խաղաղության եվրոպական հիմնադրամի միջոցով 30 միլիոն եվրոյի աջակցություն է տրամադրել ՀՀ զինված ուժերին 2024 թ-ից ի վեր։ Այս օժանդակությամբ Եվրոպական միությունն օգնում է Հայաստանին կատարելագործել երկրի նյութատեխնիկական ապահովման հնարավորությունները և բարելավել քաղաքացիական պաշտպանությունը ճգնաժամերի ժամանակ։ Այն նաև օգնում է ՀՀ զինված ուժերին՝ ԵՄ առաքելություններին աջակցելու հարցում։ Այս ոչ մահաբեր ռազմական օգնությունն ընդգծում է ԵՄ-ի՝ Հայաստանի հետ անվտանգության ոլորտում գործընկերությունը խորացնելու հանձնառությունը։

2023 թ-ի փետրվարից Հայաստանում ԵՄ առաքելությունը (ՀԵՄԱ) Հայաստան – Ադրբեջան միջազգային սահմանի հայկական կողմում իր ներկայությամբ դիտարկում և զեկուցում է տեղում անվտանգության իրավիճակը։ Քաղաքացիական առաքելությունը նպաստում է հակամարտությունից տուժած տարածքներում մարդկային անվտանգությանը և աջակցում է վստահության կառուցմանը։ Առաքելության ներկայիս մանդատը գործում է մինչև 2027 թ-ի փետրվարը։