Մարտի 2, 2025

Մարտի 2-ին ԵՄ դեսպան Վասիլիս Մարագոսը միացավ Սիմոնյան կրթական հիմնադրամին և Կապանի համայնքապետարանին՝ նշելու Կապանի և հարակից համայնքների երիտասարդների համար կրթական, տեխնոլոգիաների և ստեղծարարության նորարարական հարթակի՝ Թումո Կապանի բացումը։

Թումո Կապանը Հայաստանում նորարարությանը և տարածաշրջանային զարգացմանը աջակցելու ԵՄ հանձնառության դրսևորումն է։ Կենտրոնը ոչ միայն կօգնի երիտասարդներին ձեռք բերել այն հմտությունները, որոնք անհրաժեշտ են տեղում հաջողության հասնելու համար, այլև կնպաստի Սյունիքի մարզի կայուն տնտեսական զարգացմանը և դիմակայունության ամրապնդմանը։ Թումոյի հետ մեր համագործակցությունը ԵՄ համագործակցության ընդարձակ ծրագրի կարևոր մասն է, որն ուղղված է մարդկային կապիտալի զարգացմանը միտված ներդրումներին, տեղական տնտեսությունների ամրապնդմանը և հաջորդ սերնդի նորարարների ու ձեռներեցների պատրաստմանը, ովքեր կձևավորեն Հայաստանի ապագան:

Թումո Կապանը «Դիմակայուն Սյունիք Թիմ Եվրոպա» նախաձեռնության ուղենիշային ծրագիր է, որը Եվրոպական միության, Եվրոպական ներդրումային բանկի, Եվրոպական վերակառուցման և զարգացման բանկի, Ավստրիայի, Չեխիայի, Էստոնիայի, Ֆինլանդիայի, Ֆրանսիայի, Գերմանիայի, Լիտվայի, Նիդեռլանդների, Լեհաստանի, Շվեդիայի և Շվեյցարիայի համատեղ ծրագիրն է, որն ունի ընդհանուր նպատակ՝ խթանելու Սյունիքի կայուն սոցիալ-տնտեսական զարգացումը։

Մարտի 7, 2025

Եվրոպական միության պատվիրակությունը մեկնարկել է իր նոր՝ «Երիտասարդական խորհուրդ» (ԵԽ) նախաձեռնությունը, որի մեկնարկային միջոցառմանը մասնակցում էին Հայաստանի տարբեր համայնքների երիտասարդները, երիտասարդական աշխատողներ և կառավարության ներկայացուցիչներ։ Միջոցառման ընթացքում ներկայացվել են «Երիտասարդական խորհուրդ» (ԵԽ) նախաձեռնության նպատակները, գործողությունները և ստեղծման գործընթացը։Նախաձեռնությունն իրականացվում է ԵՄ կողմից ֆինանսավորվող «Աջակցություն մշակութային և երիտասարդական գործունեությանը» ծրագրի շրջանակում, որն իրականացվում է Գյոթե կենտրոնի կողմից։

Մարտի 20, 2025

ԵՄ նախկին հանձնակատար, Բուլղարիայի նախկին փոխվարչապետ, այժմ Եվրոպական արտաքին գործողությունների ծառայության դիվանագիտական ակադեմիայի դասախոս Մեգլենա Կունևան այցելել է Հայաստանում ԵՄ պատվիրակություն՝ հանդիպելով Երիտասարդ եվրոպական դեսպանների (ԵԵԴ) հետ:

Հանդիպման ընթացքում քննարկվել են առաջնորդության հիմնարար սկզբունքները, մարտահրավերների հաղթահարման արդյունավետ մոտեցումները, ինչպես նաև տարածաշրջանի երիտասարդության համար նոր հնարավորությունների ձևավորման հեռանկարները։

Եվրոպական քաղաքականության մեջ ունեցած իր հարուստ փորձով հայտնի Մեգլենա Կունևան կիսվել է խորքային և համապարփակ գիտելիքներով՝ ոգեշնչելով երիտասարդ դեսպաններին ակտիվորեն ներգրավվել ապագայի կերտման գործընթացում։

Ապրիլի 15, 2025

Դեսպան Վասիլիս Մարագոսը մասնակցել է ԵՄ-Հայաստան Համապարփակ և ընդլայնված գործընկերության համաձայնագրի (ՀԸԳՀ) հաղորդակցության հարթակի երկրորդ աշխատանքային հանդիպմանը, որն իրականացվել է Եվրոպական միության և Հայաստանի ներկայացուցիչների մասնակցությամբ՝ նպատակ ունենալով ուժեղացնել համակարգումը, փոխանակվել գիտելիքով և խթանել ՀԸԳՀ-ի առավելությունների վերաբերյալ արդյունավետ հաղորդակցությունը՝ ի նպաստ Հայաստանի քաղաքացիների։

Հաղորդակցության հարթակն առանցքային դեր ունի՝ օգնելով քաղաքացիներին ավելի լավ ըմբռնել ԵՄ-Հայաստան համագործակցության առավելությունները՝ սկսած բարեփոխումներից մինչև ապատեղեկատվության դեմ պայքարը, նպաստելով ավելի ուժեղ և դիմակայուն Հայաստանի կառուցմանը։

Ապրիլի 23․ 2025

ԵՄ-Հայաստան ռազմավարական քաղաքական երկխոսության հինգերորդ հանդիպումը նշանավորել է արդարադատության և կոռուպցիայի դեմ պայքարի ոլորտներում իրականացվող բարեփոխումների՝ մասնավորապես արբիտրաժի և հաշտարարության մեթոդների հաջողությամբ խթանման, դատախազների և քննիչների համար բարեվարքության ստուգումների իրականացման և արդարադատության և կոռուպցիայի դեմ պայքարի բարեփոխումների վերաբերյալ հանրային իրազեկության բարձրացման ուղղությամբ առաջընթացը։ Շարունակական ջանքեր են անհրաժեշտ՝ ապահովելու համակողմանի և թափանցիկ բարեփոխումներ, որոնք կլինեն համակարգային և կայուն։

Ապրիլի 26, 2025

Երկրի օրվա կապակցությամբ ապրիլի 26-ին Եվրոպական Միությունը և իր «Երիտասարդ եվրոպական դեսպաններ» նախաձեռնությունը Հրազդանի կիրճում կազմակերպել էին մաքրման աշխատանքներ/պլոգինգ՝ «Համայնքների կայուն զարգացման նորարարական ուծումներ» ՀԿ-ի և Հայաստանում Շվեդիայի շրջանավարտների ցանցի հետ համագործակցությամբ։

Մայիսի 6, 8, 10 2025

2025 թվականի մայիսին Հայաստանը «ԵՄ–Հայաստան․ մշակութային կամուրջ» խորագրի ներքո նշեց Եվրոպայի օրը։

Գյումրիում, Գավառում և Երևանում կազմակերպված միջոցառումները համախմբեցին երիտասարդներին, համայնքի բնակիչներին և պաշտոնյաներին՝ նշելու 33 տարվա գործընկերությունը մշակութային միջոցառումներով, ինտերակտիվ խաղերով և տարածաշրջանային նախաձեռնություններով։

Մայիսի 10-ին Երևանի Ազատության հրապարակը լի էր վառ էներգիայով․ այնտեղ ներկայացված էին ԵՄ ֆինանսավորմամբ իրականացվող ծրագրեր և դեսպանատների տաղավարներ, տոնակատարությունն ուղեկցվում էր կենդանի երաժշտությամբ։ Օրվա ամփոփիչ իրադարձությունը «Սա Եվրոպան է» թատերական ներկայացումն էր՝ ինքնության և համընդհանուր արժեքների մասին խորհելու հնարավորություն տվող ճանապարհորդություն, որն ամրապնդում էր ԵՄ-ի և Հայաստանի միջև մշակութային կապը։

Մայիսի 13, 2025

Եվրոպական հանձնաժողովի ընդլայնման և արևելյան հարևանության հարցերով գլխավոր տնօրինության ղեկավար Գերտ Յան Կուպմանի գլխավորած պատվիրակությունն այցելել է Հայաստան՝ ՀՀ կառավարության հետ քննարկելու բազմաթիվ հարցեր, որոնք ուղղված են ԵՄ-Հայաստան հարաբերությունների ամրապնդմանը, Դիմակայունության և աճի ծրագրին և մարզային ենթակառուցվածքների զարգացմանը։  

Մայիսի 15, 2025

Մայիսի 15-ին ԵՄ դեսպան Վասիլիս Մարագոսը Երևանում մասնակցել է Կայուն զարգացման միջազգային համաժողովին, որը կազմակերպել էր Եվրոպական բիզնես ասոցիացիան։ Քննարկման ընթացքում անդրադարձ է կատարվել Հայաստանի ուղուն՝ դեպի Կլիմայի փոփոխության վերաբերյալ 30-րդ համաժողովը (COP30), որը կանցկացվի 2025 թվականի նոյեմբերին Բրազիլիայի Բելեն քաղաքում, ինչպես նաև Հայաստանի դերին՝ որպես Կենսաբազմազանության մասին Կոնվենցիայի կողմերի 17-րդ համաժողովը (COP17) հյուրընկալող երկրի։ Համաժողովը կայանալու է 2026 թվականին Երևանում։

Կենսաբազմազանությունը միայն բնության մասին չէ. այն վերաբերում է նաև դիմակայունությանը, առողջությանը և ապագա բարեկեցությանը։ Վերջին տարիներին Եվրոպական միությունը տրամադրել է ավելի քան 36 միլիոն եվրո՝ Հայաստանում շրջակա միջավայրի և ջրային ոլորտներին աջակցելու համար։ Մեր համագործակցությամբ մենք կառուցում ենք ավելի կանաչ և կայուն ապագա։

Մայիսի 15, 2025

Եվրոպական հանձնաժողովի փոխնախագահ, ԵՄ արտաքին գործերի ու անվտանգության քաղաքականության հարցերով բարձր ներկայացուցիչ Կայա Կալասը հանդիպել է ՀՀ ԱԳ նախարար Արարար Միրզոյանի հետ։ Նրանք քննարկել են ԵՄ աջակցությունը Հայաստան-Ադրբեջան նորմալիզացման գործընթացին։

Մայիսի 16, 2025

Երևանում պաշտոնապես ամփոփվել է ԵՄ Կանաչ գյուղատնտեսության նախաձեռնությունը (EU-GAIA), որը ԵՄ-ի կողմից ֆինանսավորվող ամենամեծ նախագիծն է Հայաստանի գյուղատնտեսության ոլորտում։

Ծրագիրը, որը համաֆինանսավորվում է Եվրոպական միության և Ավստրիական զարգացման համագործակցության կողմից և իրականացվում Ավստրիական զարգացման գործակալության կողմից, իր նպաստն է ունեցել խթանելու կայուն և օրգանական գյուղատնտեսությունը, արդիականացնելու գյուղանտեսական կրթությունը և զորեղացնելու համայնքային հնարավորությունները։

Չնայած մեծ մարտահրավերներին՝ EU-GAIA ծրագիրը Հայաստանի մարզերում նպաստել է իրական փոփոխություններին։

Մայիսի 16, 2025

Կարևոր է յուրաքանչյուր մարդ։ Ոչ ոք չպետք է անտեսվի՝ անկախ սեռական կողմնորոշումից, գենդերային ինքնությունից կամ դրա արտահայտումից։ Այս տարվա թեման՝ «Համայնքների ուժը», խորհրդանշում է բազմազանությունը և համատեղ համերաշխությունը։ Միասին մենք կարող ենք կառուցել մի ապագա, որտեղ հավասարությունը կլինի ոչ թե պարզապես ձգտում, այլ՝ իրականություն բոլորի համար։

Մայիսի 16, 2025

Մայիսի 16-ին ՀՀ-ում ԵՄ դեսպան Վասիլիս Մարագոսը հանդիպել է ՀՀ փոխվարչապետ Տիգրան Խաչատրյանի հետ՝ քննարկելու Լեռնային Ղարաբաղի հայերի սոցիալ-տնտեսական ինտեգրման ուղղությամբ Կառավարության ներդրած ջանքերը։

2023 թվականի սեպտեմբերից Եվրոպական միությունը, սերտ համագործակցելով Հայաստանի կառավարության հետ, տրամադրել է ավելի քան 67 միլիոն եվրո՝ փախստականների կարիքները բավարարելու նպատակով։ Այդ միջոցներից 40 միլիոն եվրոն ուղղվել է «Պետության և դիմակայունության ամրապնդման բյուջետային աջակցության» ծրագրին, որի նպատակն է հզորացնել ինստիտուցիոնալ արձագանքը և նպաստել փախստականների երկարաժամկետ ինտեգրմանը։

Մայիսի 16, 2025

ԵՄ դեսպան Վասիլիս Մարագոսն Օշականում մասնակցել է եվրոպական ինքնության և մշակույթին նվիրված ակտիվ և ներգրավող միջոցառմանը, որը համախմբել էր տեղի երիտասարդներին և Վրաստանից ժամանած «DRONI» երիտասարդական ասոցիացիայի ներկայացուցիչներին։

Մայիսի 23, 2025

Մայիսին, Երևանում կայացավ ԵՄ տարածաշրջանային սեմինարը՝ ապահովելով ավելի լայն հնարավորություն ԵՄ-Հայաստան համագործակցության խորացման համար։ Սեմինարի շրջանակներում ԵՄ բարձր մակարդակի ղեկավարությունը, այդ թվում՝ ԵՄ Արտաքին գործողությունների Եվրոպական ծառայության տնօրեն Միխայել Զիբերթը, ինչպես նաև՝ Արևելյան Եվրոպայից և Կենտրոնական Ասիայից դեսպանները հյուրընկալվեցին Հայաստանի վարչապետ Նիկոլ Փաշինյանի կողմից։

Մայիսի 23, 2025

Հին ձեռագրերի վերականգնման թղթի՝ ԵՄ կողմից ֆինանսավորված աշխատարանի բացման հանդիսավոր արարողությունը տեղի ունեցավ Մատենադարանում։

Աշխատարանի արտադրությունը մասամբ ֆինանսավորվել է ԵՄ-ի կողմից՝ «ԵՄ-ն մշակույթի համար» ծրագրի շրջանակում, որն իրականացվում է Գյոթե ինստիտուտի կողմից։

Թղթի արտադրության ավանդական տեխնիկայի վերածնունդն ու շարունակականությունը վերաբերում են ոչ միայն անցյալի պահպանմանը, այլ նաև՝ ներկայում կայունության և արհեստագործության խթանմանը։ Այս հմտությունները կենսական են արժեքավոր ձեռագրերի երկարաժամկետ պահպանման համար։ Նման աշխատարանները համախմբում են տարբեր ոլորտների մասնագետների, արվեստագետների և վերականգնող մասնագետների։ Դրանք այնպիսի լաբորատորիաներ են, որտեղ փոխանակվում են գիտելիքներ, ծնվում են նոր գաղափարներ և կառուցվում եվրոպական և հայկական մշակույթների միջև կամուրջներ»։

Մայիսի 23, 2025

Մայիսի 23-ին Երևանում՝ Կինոյի տանը, տեղի է ունեցել Եվրոպական կինոփառատոնի բացման երեկոն։ Սա Եվրոպայի հարուստ կինոժառանգության տոնն է, կինոյի՝ մշակույթները միավորելու, երկխոսություն խթանելու և ոգեշնչելու` կաղապարներ չճանաչող կարողության տոնն է։

Մայիսի 26, 2025

Նշում ենք ազդեցությանն ուղղված ձեռքբերումների 5 տարին։ Երևանի «Իմփաքթ Հաբ»-ում «Համագործակցություն հանուն սոցիալական ազդեցության» ծրագիրը նշեց Հայաստանում սոցիալական ձեռնարկատիրության էկոհամակարգի զորեղացմանը նվիրված իր հինգ տարվա ժառանգությունը։

Նպատակի ու եկամուտի միջև գոյություն ունեցող բացը լրացվում է սոցիալական ձեռնարկատիրության միջոցով՝ բիզնես մոդելների հիմքում դնելով հանրության կարիքները։ Այն զորեղացնում է մարդկանց՝ հնարավորություն տալով դառնալ փոփոխություն իրականացնողներ և համակարգային խնդիրների դեմ պայքարել նորարարական և տեղական իրողություններին հարմարեցված լուծումներով։ Այս մոտեցման շղթայական ազդեցությունն առավել քան զգալի է, երբ սոցիալական մի ձեռնարկություն ծաղկում է, այն իր հետ զարգացնում է նաև ամբողջ համայնքը՝ շնորհիվ ստեղծված աշխատատեղերի, արժանապատվության և մնայուն փոփոխությունների։ ՎԻԱ հիմնադրամը, Հայաստանում սոցիալական ձեռնարկությունների համար նախատեսված ազդեցության ներդրումային առաջին գործիքն, այստեղ է՝ գործելու և զարգանալու։ Շնորհիվ նորարար ձեռներեցների՝ հայկական էկոհամակարգն ավելի ուժեղ է, քան երբևէ։ Իսկ ԵՄ-ն, որպես հավատարիմ գործընկեր, ձեր կողքին է առաջընթացի ճանապարհին։

Մայիսի 26, 2025

Մայիսի 26-ին «Երևանյան երկխոսություն» միջազգային համաժողովին մասնակցելու նպատակով Հայաստան էր ժամանել Եվրոպական արտաքին գործողությունների ծառայության (ԱԳԱՔ) գլխավոր քարտուղար Բելեն Մարտինես Կարբոնեն։

Այցի ընթացքում նա ընդգծել է ԵՄ պատրաստակամությունը՝ աջակցելու Հայաստանի դիմակայունությանն ու բարեփոխումներին։ Հայաստանում նա հանդիպել է ՀՀ ԱԳ նախարար Արարատ Միրզոյանի և ԱԳ փոխնախարար Վահան Կոստանյանի հետ, ինչպես նաև այցելել ԵՄ դիտորդական առաքելության գրասենյակ՝ ՀՀ-ում ԵՄ դեսպան Վասիլիս Մարագոսի հետ։

Մայիսի 29, 2025

Եվրոպական միությունն առաջարկում է նոր ռազմավարություն՝ Սևծովյան տարածաշրջանի կայունությունն ու անվտանգությունը խթանելու համար։

Այս ռազմավարությունն ուղղված է կապերի ու տնտեսական աճի խթանմանը՝ Եվրոպան կապելով Հարավային Կովկասի, Կենտրոնական Ասիայի և դրանից դուրս գտնվող տարածաշրջանների հետ։ Ռուսաստանի՝ Ուկրաինայի դեմ ագրեսիվ պատերազմի պայմաններում ռազմավարությունը նպատակ ունի նաև ամրապնդել ԵՄ-ի աշխարհաքաղաքական դերը որպես հուսալի դերակատար Սևծովյան տարածաշրջանում։

ԵՄ-ն կխորացնի համագործակցությունը Ուկրաինայի, Մոլդովայի, Վրաստանի, Թուրքիայի, Հայաստանի և Ադրբեջանի հետ՝ շարունակելով համագործակցությունը տարածաշրջանային կապուղիների զարգացման ուղղությամբ։ Այս երկրներից մի քանիսն ընտրել են ԵՄ-ին միանալու կամ դրա հետ սերտորեն համագործակցելու ուղին։

ԵՄ-ն նպատակ ունի կառուցել ավելի ուժեղ, դիմակայուն և մրցունակ Սևծովյան տարածաշրջան։

Ավելին՝ https://europa.eu/!9C4fCb